“Projekti Pegasus”: si funksionon, kush është më i cenueshëm dhe pse është e vështirë të mbrohemi nga hakerat

Nga Craig Timberg  dhe  Drew Harwell

“Projekti Pegasus” i është nënshtruar një hetimi, kryer nga “Washington Post” dhe 16 kompani lajmesh në 10 vende të ndryshme të botës, nën koordinimin e organizatës jo-fitimprurëse me bazë në Paris “Forbidden Stories” dhe “Amnesty International”. Dy organizatat kishin akses në një listë me më shumë se 50,000 numra telefoni, që kishin shërbyer si objektiva vëzhgimi për klientët e kompanisë izraelite të spiunazhit “NSO Group”, listë të cilën e ndanë me gazetarët. Për disa muaj me radhë, gazetarët rishikuan dhe analizuan listën, në synimin për të mësuar identitetin e pronarëve të numrave të telefonit, si dhe për të përcaktuar nëse telefonat e tyre ishin survejuar nga “NSO Group”.

Nga hetimi, u konstatua se nga numrat e telefonit që gjendeshin në listë, më shumë se 1,000 u takonin zyrtarëve të qeverive të ndryshme, si dhe gazetarëve, biznesmenëve dhe aktivistëve të të drejtave të njeriut, ndërsa për 67 numra të listës u arrit të mblidheshin edhe të dhëna. Këto të dhëna u analizuan në mënyrë ligjore nga Laboratori i Sigurisë i “Amnesty International”. Për tridhjetë e shtatë prej tyre, provat treguan ose përpjekje për një ndërhyrjeje ose ndërhyrje e suksesshme.

Analiza e mëtejshme tregoi se shumë prej ndërhyrjeve ose përpjekjeve për ndërhyrje janë regjistruar menjëherë pasi numri i telefonit ishte futur në listë – disa brenda sekondave – duke sugjeruar një lidhje midis listës dhe përpjekjeve të mëpasshme për mbikëqyrje.

Pyetjet që shtrohen janë: Sa të prekshëm jemi, si qytetarë, nga ndërhyrje të kësaj forme? A ka hapa që mund të ndërmarrim për ta mbajtur telefonin të sigurt?  

Fillimisht, çfarë është një “aplikacion spiunimi” dhe kush e përdor atë?

“Aplikacion spiunimi” është termi që përdorim për të karakterizuar një kategori të caktuar programesh, synimi i të cilave është mbledhja e informacioneve nga kompjuteri, telefoni ose çfarëdo pajisje elektronike e një personi, pa dijeninë e tij. “Aplikacioni i spiunimit” mund të jetë relativisht i thjeshtë – në këtë rast, projektuesi njeh pikat e dobëta të sigurisë të pajisjeve dhe programeve të ndryshëm dhe që përdoren gjerësisht, të cilat i shfrytëzon me kujdes për ta bërë spiunimin sa më të paidentifikueshëm. Por mund të jenë edhe shumë të sofistikuar dhe u japin mundësi zotëruesve të “fusin hundët” edhe në pajisjet më të fundit dhe me nivele tejet të larta sigurie – këtë ka bërë “Projekti Pagasus”.   

Aplikacionet e sofistikuara të spiunimit zakonisht përdoren nga agjencitë e zbatimit të ligjit ose të inteligjencës dhe janë shumë të shtrenjta. Ekziston një treg i fuqishëm privat që u mundëson kombeve që kanë mundësi të përballojnë shpenzimet e kësaj natyre, përfshirë Shtetet e Bashkuara. Prej kohësh dyshohet se edhe grupet terroriste apo bandat e sofistikuara kriminale kanë qasje në aplikacione të kësaj natyre. Për shembull, një aplikacion i kësaj natyre u krijua nga një kompani tjetër izraelite, Candiru, i cili u përdor për të infektuar kompjuterat dhe telefonat e aktivistëve, politikanëve dhe viktimave të tjera përmes faqeve ueb që reklamoheshin si promovuese të kauzave të ndryshme, si “Black Lives Matter” – deklaruan studiuesit e sigurisë kibernetike të Microsoft dhe Citizen Lab të Universitetit të Torontos.

Çfarë informacioni mbledh një aplikacion i kësaj natyre?

Pothuajse gjithçka që gjendet në kujtesën e pajisjes elektronike është e prekshme nga një aplikacion spiun i sofistikuar. Shumë njerëz janë të njohur me përgjimin tradicional, i cili lejon monitorimin në kohë reale të thirrjeve, por këto lloj aplikacionesh synojnë shumë më tepër, duke filluar nga posta elektronike deri tek postimet në rrjetet sociale, regjistrimet e thirrjeve apo edhe mesazhet e shkëmbyeta në aplikacione të koduara të bisedave si “WhatsApp” ose “Signal”. Akoma, mund të përcaktojë vendndodhjen e përdoruesit, së bashku me faktin nëse personi është në prehje ose në lëvizje – dhe nëse po, edhe në çfarë drejtimi po kryhet lëvizja; mund të mbledhë kontakte, emra përdoruesish, fjalëkalime, shënime dhe dokumente, si fotografi, video dhe regjistrime zanore; mund të aktivizojë mikrofonin dhe kamerën – pa ndezur dritat ose ndonjë tregues tjetër që tregon se regjistrimi ka filluar. Në thelb, nëse përdoruesi mund të bëjë diçka në pajisjen e tij, këtë mund ta bëjnë edhe operatorët e aplikacioneve spiune të sofistikuara.  Disa madje mund të dërgojnë skedarë në pajisje pa miratimin apo dijeninë e përdoruesit.

Pse nuk e ndalon kriptimi këtë?

Ajo që njihet si “enkriptimi fund më fund” mbron transmetimin e të dhënave midis pajisjeve. Enkriptimi është i dobishëm sepse ndalon sulmin e një hakeri që përgjon dhe kupton se është është dërguar një mesazh midis dërguesit dhe marrësit të tij: mesazhi është i kyçur me një çelës specifik të enkriptimit. Forma të tilla të kriptimit, filluan të përdoren gjerësisht në shërbimet tregtare, pas skandalimit të përgjimeve denoncuar nga Edward Snowden më 2013, pjesë e Agjencisë Kombëtare të Sigurisë, por në të njëjtën kohë e bënë të vështirë për agjencitë qeveritare të kryejnë mbikëqyrje masive gjatë monitorimit të trafikut të Internetit. Por nuk janw të dobishme për të na ruajtur nga sulmet e aplikacioneve spiune, që kanë objektiv pikërisht “pikën përfundimtare”, ose ndryshe synojnë fundin e komunikimit: sapo mesazhi i koduar hyn në pajisjen e synuar, sistemi ekzekuton një program për të deshifruar mesazhin dhe për ta bërë atë të lexueshëm. Kur kjo ndodh, mesazhi tashmë regjistrohet edhe nga palët që janë jashtë komunikimit.

Çfarë është NSO?

“NSO Group” është një kompani private me seli në Izrael që është prodhuese kryesore e  aplikacioneve spiune. Një nga produktet e prodhuara nga ky grup quhet “Pegasus” dhe është krijuar për të depërtuar në pajisjet “iPhone” dhe “Android”. E themeluar në vitin 2010, kompania thotë se ka 60 klientë qeveritarë në 40 vende. Kompania, e cila gjithashtu ka zyra në Bullgari dhe Qipro, thuhet se ka 750 punonjës dhe regjistroi të ardhura prej më shumë se 240 milion dollarë vitin e kaluar. Shumicën e aksioneve të “NSO Group” e zotëron Novalpina Capital, një firmë me kapital privat, me qendër në Londër.

Kush janë klientët e “NSO Group”?

Kompania nuk i tregon klientët dhe justifikohet duke përmendur marrëveshjet e konfidencialitetit. “Citizen Lab” ka dokumentuar infeksione të dyshuara nga “Pegasus” në 45 vende: Algjeri, Bahrein, Bangladesh, Brazil, Kanada, Egjipt, Francë, Greqi, Indi, Irak, Izrael, Bregu i Fildishtë, Jordan, Kazakistan, Kenia, Kuvajt, Kirgistan, Letoni, Liban, Libia, Meksika, Maroku, Hollanda, Omani, Pakistani, territoret Palestineze, Polonia, Katari, Ruanda, Arabia Saudite, Singapori, Afrika e Jugut, Zvicra, Taxhikistani, Tailanda, Togo, Tunizia, Turqia, Emiratet e Bashkuara Arabe, Uganda, Mbretëria e Bashkuar, Shtetet e Bashkuara, Uzbekistani, Jemeni dhe Zambia. Sidoqoftë, prania e telefonave të infektuar nuk do të thotë domosdoshmërisht se qeveria e një vendi është klient.

“NSO Group” ka thënë prej kohësh që “Pegasus” nuk mund të përdoret për të shënjestruar telefonat në SHBA dhe se duhet të përdoret vetëm kundër “kriminelëve dhe terroristëve të dyshuar”. Por grupet kërkimore kanë zbuluar se është përdorur për të spiunuar figura politike, gazetarë dhe aktivistë të të drejtave të njeriut – gjetje të konfirmuara nga hetimi i Projektit Pegasus.

Si zbulohet që një pajisje është infektuar me një aplikacion spiun?

Aplikacionet spiune moderne ndërtohen për të kapërcyer sistemet e mbrojtjes së pajisjes apo të programit që po përdor dhe kur ia arrijnë synimit, operojnë në mënyrë të atillë sikur asgjë nuk ka ndodhur, kështu që telefonat e hakuar shpesh duhet të shqyrtohen nga afër para se të tregojnë provat se ishin shënjestruar. “Amnesty’s Security Lab” krijoi një test për të skanuar të dhënat nga telefonat për gjurmët e një infeksioni të mundshëm “Pegasus”. Konsorciumi i organizatave pyeti njerëzit nëse do të pajtoheshin me analizën pasi të mësonin se numrat e tyre ishin në listë. Gjashtëdhjetë e shtatë ranë dakord. Prej tyre, të dhënat për 23 telefonë treguan prova të një infeksioni të suksesshëm dhe 14 kishin gjurmë përpjekjesh.

Për 30 telefonat e mbetur, testet ishin jopërfundimtare, në disa raste sepse telefonat kishin humbur ose ishin zëvendësuar. Gjithesi, testet u zbatuan  në skedarë rezervë, që kishin të dhëna nga telefoni i mëparshëm. Pesëmbëdhjetë nga testet ishin në të dhëna nga telefonat Android – asnjë prej tyre nuk tregonte prova të infeksionit të suksesshëm. Sidoqoftë, ndryshe nga iPhone, Androids nuk regjistrojnë llojet e informacionit të kërkuar për punën detektive të Amnesty. Tre telefona Android treguan shenja të shënjestrimit, siç janë mesazhet SMS të lidhura me “Pegasus”.

A mund të them nëse pajisja ime është hakuar?

Me siguri jo. Aplikacioni spiun është krijuar për të punuar vjedhurazi dhe për të mbuluar gjurmët e tij. Kjo është arsyeja pse mbrojtja më e mirë është ruajtja nga infeksioni.

A është pajisja ime e prekshme?

Pothuaj të gjithë telefonat inteligjentë janë të prekshëm, ndonëse për shumicën e përdoruesve të zakonshëm të telefonave inteligjentë vështirë të thuhet se do të jenë ndonjëherë pjesë e listës së “Pegasus”. Përveç të dyshuarve për krime dhe terroristëve, ata që ka më shumë të ngjarë të jenë shënjestra vëzhgimi janë gazetarët, aktivistët e të drejtave të njeriut, politikanë, diplomatë, zyrtarë të lartë të qeverisë, biznesmenë të fuqishëm apo edhe të afërm dhe bashkëpunëtorë të kategorive të mësipërme. Telefonat e krijuar posaçërisht – dhe shumë të kushtueshëm – që përdorin varietete të sistemit operativ Android së bashku me masat e përparuara të sigurisë mund t’i rezistojnë sulmeve të kësaj natyre, por nuk ka asnjë mënyrë për ta ditur me siguri se sa mirë e kryejnë këtë mbrojtje.

A ka ndonjë rregull a ligj për të na mbrojtur?

Në pjeswn më të madhe të vendeve të botës ka pak mbrojtje kuptimplote ligjore nga të qenit shënjestër i sulmeve të kwsaj natyre. “NSO Group” thotë se “Pegasus” nuk mund të përdoret në numra brenda SHBA, aleati më i rëndësishëm i Izraelit. SHBA kanë disa kufizime ligjore për aplikacione të kwsaj natyre, përfshirë Ligjin Federal të Mashtrimit dhe Abuzimit me Kompjuterin, i cili u miratua në vitin 1986 dhe ndalon “hyrjen e paautorizuar” në një kompjuter ose telefon, por gjuha e paqartë e formulimit ka bërë që shpesh të zbatohet në mënyrë të pabarabartë në gjykatë. Disa shtete kanë miratuar ligje mbi sigurinë kibernetike dhe ligjet e privatësisë, siç është Akti i Përgjithshëm i Hapjes së të Dhënave Kompjuterike dhe Mashtrimit i shtetit të Kalifornisw, i cili ndalon ndërhyrjet ose ndërhyrjet elektronike. “WhatsApp” i ka cituar të dy ligjet në një çështje gjyqësore që ka hapur kundër “NSO Group” dhe që është në vazhdim.

A ka gjëra që mund të bëj për ta bërë veten më të sigurt?

Ekzistojnë disa parime kryesore të sigurisë kibernetike që i bëjnë njerëzit disi më të sigurt nga hakerat e të gjitha llojeve:

  • Përditësoni pajisjet dhe programet, mundësisht duke aktivizuar “përditësimet automatike”.
  • Pajisjet që kanë më shumë se pesë vjet që përdoren – veçanërisht nëse ato po përdorin sisteme operative të vjetruara – janë veçanërisht të cenueshme.
  • Përdorni një fjalëkalim unik, të vështirë për t’u menduar për secilën pajisje, faqe dhe aplikacion që përdorni dhe shmangni ato të parashikueshme lehtësisht bazuar në numrin tuaj të telefonit, datën e lindjes ose emrat e kafshëve tuaja shtëpiake.
  • aktivizoni “vërtetimin me dy faktorë” kudo që mundeni. Në rrjedhojë, faqet që përdorni do ju kërkojnë jo vetëm fjalëkalimin, por edhe një kod të dytë, ose do iu dërgojnë në telefonin tuaj një mesazh të veçantë vërtetues.
  • Shmangni klikimin në lidhje ose bashkëngjitje nga njerëz që nuk i njihni. Kur është e mundur, aktivizoni “mesazhet që zhduken” ose cilësime të ngjashme në mënyrë që komunikimet të zhduken automatikisht pas një periudhe të caktuar kohe.

Reforma në drejtësi / Ambasadorja Yuri Kim: Duhet të gjejmë mënyrën se si të ecim përpara

Në një aktivitet për reformën në drejtësi, zhvilluar sot, ku të pranishëm ishin edhe krerët e KLGJ dhe KLP, kryediplomatja amerikane, znj. Yuri Kim, bëri apel për rëndësinë e  çuarjes përpara të reformës, duke shtuar se për çdo mangësi, kostot i paguajnë brezat e ardhshëm.

Ambasadorja e SHBA, u shpreh:

Duhet të gjejmë mënyrën se si të ecim përpara. Ne do të njihemi me hollësitë e gjetjeve të Komitetit Shqiptar të Helsinkit. Institucionet e reformës në drejtësi tashmë janë ngritur. Është e rëndësishme për ne të kuptojmë punën e KLGJ dhe KLP, si kanë ecur deri tani. SPAK ka prokurorët. Klasa e parë e hetuesve të BKH do të përfundojë trajnimin së shpejti. Ka shumë gjyqtarë e prokurorë që janë larguar nga detyra dhe kjo është një gjë e mirë. Nëse jemi serioz për kapjen e momentit në të cilin është Shqipëria, për të pasur një Shqipëri më të mirë dhe më të denjë si anëtare e BE, më të sigurt dhe po aq të begatë sa çdo anëtar tjetër i BE, reforma në drejtësi duhet të vazhdojë.

Le të ndalojmë së shtiruri dhe të çojmë reformën përpara. E kuptoj që puna e gjyqtarëve nuk është e lehtë, por është e rëndësishme. Nuk mund t’ia lejojmë vetes të mos kemi sukses në këtë reformë. Së pari, KLD duhet të plotësojë detyrën e tij për të pasur një SPAK me gjyqtarë që kanë kaluar Vettingun. Nuk ka dyshim që plotësimi i vendeve bosh, të shkaktuara nga Vettingu ka qenë alarmuese. Por, KLD ka mundësinë për të rikthyer procesin ne shtegun e duhur. Këshilli duhet të veprojë tani për të bërë një vlerësim të sistemit, duke bërë hartësimin gjyqësor dhe duke iu kërkuar llogari magjistratëve.

Këshilli duhet të themelojë e caktojë mirë standardet, me qëllim që t’iu kërkojë llogari magjistratëve. Këshilli duhet të ndjekë rregullat e procedurat, në kohën e përcaktuar nga ligji. KLGJ e KLP kanë shumë punë përpara, por nuk janë vetëm. Ne e kuptojmë që ata janë qenie njerëzore. Ne e kuptojmë trysnin, ndoshta jo aq mirë sa ju, por e kuptojmë po aq sa ju rëndësinë e të ecurit përpara. Ky është momenti, ju keni rol tejet të rëndësishëm. Fëmijët, brezi i ardhshëm, e kanë mendjen te ju. Askush nuk mendon që është gjë e lehtë, e di që ka një kosto vetjake dhe profesionale, por është një kosto që ja vlen, se është në të mirë të shtetit shqiptar. Nëse ju nuk jeni të guximshëm, të paguani kostot, apo nëse të gjithë ne nuk i paguajmë kostot, do t’i paguajnë brezat e ardhshëm.

Bisedimet Kosovë – Serbi / Këshilli i Ambasadorëve Shqiptarë mirëpret rinisjen e bisedimeve

Këshilli i Ambasadorëve Shqiptarë mirëpret rinisjen e bisedimeve mes Republikës së Kosovȅs dhe Republikës së Serbisë, për normalizimin e marrëdhënieve të tyre ndër-shtetërore.

Reagimi i Këshillit të Ambasadorëve Shqiptarë:

Këto bisedime të lehtësuara nga Bashkimi Europian dhe të mbështetura nga Shtetet e Bashkuara të Amerikës duhet të përfundojnë me njohjen e ndërsjellë, si rruga e vetme për normalizimin e plotë të marrëdhënieve mes të Republikës së Kosovës dhe Republikës së Serbisë. Kjo, jo vetëm që do ishte në interesin më të mirë të të dyja vendeve, por do ishtë një hap i madh drejt forcimit të paqes, stabilitetit dhe perspektivës Euro-Atlanike të rajonit tonë. Këshilli i Ambasadorëve Shqiptarë beson fuqimisht se stabiliteti dhe prosperiteti i rajonit tonë është pandashmërisht i lidhur me garantimin e sovranitetit dhe integritetit territorial të secilit shtet, respektimin e parimeve të demokracisë dhe të drejtave të njeriut si dhe mbrojtjen dhe avancimin e pozitës së pakicave entike.

Marrëveshja për normalizimin e marrëdhȅnieve ndërmjet Republikës së Kosovës dhe Republikës së Serbisë duhet të arrihet brenda këtyre parimeve, të sanksionuara edhe në paketën Ahtisaari dhe vendimin e Gjykatës Ndërkombëtare të Drejtësisë.

Këshilli i Ambasadorevë Shqiptarë e konsideron të domosdoshme të theksojë se perspektiva Euro-Atlantike është forca kryesore shtytëse drejt një stabiliteti dhe prosperiteti të qëndrueshȅm të Ballkanit. Ndaj kjo perspektivë duhet të jetë reale dhe e prekshme për të gjitha vendet e rajonit.

Në këtë sfond, Këshilli i Ambasadorëve Shqiptarë thekson rëndësinë e liberalizimit sa më parë të vizave për Kosovën nga ana e Bashkimit Europian, tashmë kur të gjitha kushtet janë përmbushur prej kohësh.

Këshilli i Ambasadorȅve Shqiptar inkurajon përfaqȅsuesit e Republikës sȅ Kosovȅs dhe të gjitha forcat politike në Kosovë që të angazhohen me vetbesim dhe profesionalizëm në bisedimet me Republikȅn e Serbisë, të mbështetura nga BE dhe SHBA.

KASH gjithashtu inkurajon ndërmjetësin e BE Lajçak, që në këtë proces të vijojë të udhëhiqet nga parimet mbi të cilat është ndërtuar dialogu duke ushtruar vetëpërmbajtje prej qëndrimeve emocionale të padobishme.

E ardhmja e Republikȅs sȅ Kosovës është nën ombrellën e BE-sȅ dhe NATO-s dhe vlerat Euro-Atlantike janë të mishëruara thellë në themelin shtetit të Kosovës.

 



 

 



 

SHBA dhe të tjerët / Kush trafikon qenie njerëzore “stop” hyrjes

Ambasadorja e SHBA, znj. Yuri Kim ka komentuar sot, në një konferencë të OSBE-së, urdhrin e ri të Presidentit të SHBA, Joe Biden, ku përfshihet Shqipëria dhe ish-Jugosllavia, për ndalimin e zyrtarëve dhe ish-zyrtarëve të këtyre vendeve që janë përfshirë në korrupsion qeveritar apo ndikojnë në destabilizimin e e rajonit.

Sipas znj. Yuri Kim:

Biden e ka bërë të qartë, që korrupsioni dhe krimet destabilizuese përbëjnë kërcënime jo vetëm për SHBA, por edhe për botën. Shqipërisë për integrimin në BE nuk i kërkohet asgjë më shumë! Urdhri i Biden lidhur me Ballkanin Perëndimor e ngre në përparësi! Ne synojmë që përgjegjësit ose bashkëpunëtorët për abuzimin me të drejtat e njeriut të jenë pas hekurave! Dërgojini në burg trafikantët. Nëse trafikoni qenie njerëzore do ju pezullojmë hyrjen në SHBA, nëse keni vizë ajo nuk do iu hyjë më në punë, nëse trafikoni qenie njerëzore do të marrim veprime për pronën tuaj nëse ka lidhje me SHBA! Urdhri i Biden kërkon veprim kolektiv. Presim bashkëpunimin me OSBE-në për të zbatuar përgjegjësitë tona së brendshmi dhe së jashtmi për qëllimin e përbashkët.

Shqipëria është në një pikë kthese, është anëtare e NATO-së, sapo keni fituar një vend në OKB dhe Shqipëria është në prag të hapjes formale të negociatave me BE-në. Ky është momenti për Shqipërinë që të tregojë udhëheqjeje për problematikën e trafikimit të qenieve njerëzore. Falë reformës në Drejtësi, ju e dini që keni profesionistët për të vendosur trafikantët pas hekurave, si dhe për të ndihmuar viktimat.

Le të punojmë së bashku për të luftuar trafikimin e qenieve njerëzore!

Negociatat me Bashkimin Europian / “Nusja” më në fund thotë “PO”!

Hapen negociatat me Bashkimin Europian! Nusja jonë, Holanda, më në fund tha “PO”! Parlamenti holandez ka votuar sot pro hapjes së negociatave të Shqipërisë për në BE. Pas qeverisë, edhe parlamenti holandez është shprehur pro nisjes së negociatave të anëtarësimit të Shqipërisë në Bashkimin Europian. Lajmi është dhënë nga mediat holandeze, të cilat shkruajnë se Komisioni për Çështjet e Jashtme në Parlamentin e Holandës ka mbështetur qëndrimin e qeverisë për përcaktimit sa më parë të datës për mbajtjen e Konferencës Ndërqeveritare Shqipëri-BE, duke vlerësuar se “Shqipëria ka bërë përparim të mjaftueshëm për fillimin e bisedimeve me BE”.

Ministrja holandeze për Tregtinë e Jashtme dhe Bashkëpunimin për Zhvillim, Singrid Kaag, duke folur para deputetëve tha se Shqipëria ka bërë hapa përpara sa i përket luftës kundër korrupsionit dhe krimit të organizuar.

Kujtojmë se Holanda ka qenë gjithnjë skeptike për hapjen e negociatave me Shqipërinë dhe ka deklaruar jo-në e saj! Vetëm një vit më parë, më 2020, Stef Blok, ministër i Jashtëm, pas mbledhjes së kabinetit qeveritar holandez, deklaronte, se:

“Shqipëria duhet të ndërmarra hapa të tjerë në luftën kundër korrupsionit dhe të përmirësojë sundimin e ligjit! Mbajtja e Konferencës së parë ndërqeveritare me Shqipërinë varet nga veprimet konkrete në luftën kundër krimit të organizuar dhe korrupsionit. Demonstrimi i një historiku me fakte në luftën kundër krimit të organizuar dhe korrupsionit ishte dhe mbetet një nga kushtet vendimtare në gjykimin për Shqipërinë. Jemi informuar për mosmarrëveshjet për Reformën e re Zgjedhore si dhe pengesat në funksionimin e Gjykatës Kushtetuese.”

Ndërsa sa i përket Maqedonisë së Veriut, Blok deklaronte se Qeveria ku ai bën pjesë është e interesuar për hapjen e negociatave me shtetin ballkanik, sepse “Maqedonia e Veriut ka bërë hapa të mëdhenj përpara. Përparimi në sundimin e ligjit vazhdon”.

Tashmë nuk kemi më pengesa! Të paktën kemi negociatat!

Ministri i Punëve të Jashtme të Kroacisë, Gordan Grliq Radman

Shteti i Kosovës /Ministri i Punëve të Jashtme të Kroacisë apel për njohje

Ministri i Punëve të Jashtme të Kroacisë, Gordan Grliq Radman, në Konferencën Ndërkombëtare GLOBSEC në Bratislavë të Sllovakisë, u ka bërë thirrje 5 shteteve të Bashkimit Europian të njohin pavarësinë e Kosovës. Shefi i diplomacisë kroate po merr pjesë në konferencën ndërkombëtare GLOBSEC në Bratislavë, në të cilën gjithashtu do të diskutohet situata në Ballkanin Perëndimor.

Radman deklaroi se Kroacia inkurajon Qipron, Greqinë, Rumaninë, Spanjën dhe Sllovakinë që të njohin pavarësinë e Kosovës:

  • Kroacia inkurajon pesë anëtarët e tjerë të Bashkimit Europian të njohin Kosovën, sepse kjo do të kontribuonte në stabilizimin e rajonit dhe vetë Kosovës. Integriteti territorial i shteteve të Ballkanit duhet të ruhet dhe të respektohet, domethënë pa i ridefinuar kufijtë, siç kemi dëgjuar muajt e fundit, kur qarkulluan disa ‘non paper’ famoze, të cilat ishin orientuar në atë drejtim

Covid 19 / Ndryshojnë rregullat e grumbullimeve publike në Shqipëri

Nga sot hyn në fuqi rregulli i ri. Lejohen grumbullimet në ambientet e jashtme deri në 50 persona, nga 10 që ishte dikur. Ministria e Shëndetësisë lajmëron se kanë ndryshuar rregullat ndaj koronavirusit. Sipas një njoftimi të saj, në ambientet e jashtme do të lejohen 50 persona, nga 10 që ishte më herët.

Njoftim i Ministrisë të Shëndetësisë

Plani i lehtësimit të masave #antiCOVID, duhet të shoqërohet me respektim të rregullave, për kufizimin e përhapjes së #COVID19 të distancës sociale në zbatim të protokolleve të IShP.

Kujtojmë që nga data 1 qershor:

  • Është hequr detyrimi për mbajtjen e barrierës mbrojtëse në ambientet e jashtme; ka mbetur detyrimi i mbajtjes së maskës në ambjentet e mbyllura, si dhe në mjetet e transportit publik.
  • Rekomandohet mbajtja e maskës kudo ku nuk mund të ruhet distancimi social, si edhe për ata që ende nuk kanë bërë dy dozat e vaksinës që konsiderohen persona në risk.
  • Ora policore është për orarin 23:00 -06:00.
  • Klubet e natës, diskot, vijojnë të mbeten të mbyllura. Muzika lejohet deri në orën 22:00.

Nga 1 korriku 2021

  • Ora policore shtyhet në oren 24.00 -06:00.
  • Orari për muzikën nuk ndryshon, pra do të mbetet ora 22:00.
  • Lejohen kampionatet sportive me prezencë të tifozëve me kapacitete të reduktuara deri në 30% sipas protokollit të IShP.
  • Lejohen aktivitetet e teatrove, shfaqjeve artistike dhe kulturore, konferencave, me kapacitet të reduktuar deri në 30% të spektatorëve apo pjesëmarrësve, sipas protokolleve të IShP.

Zgjedhjet në Partinë Demokratike: 75 mijë anëtarë votojnë sot për kryetarin e ri

Partia Demokratike, partia më e madhe e opozitës në Shqipëri, zhvillon sot, datë 13 qershor 2021, zgjedhjet për kreun e ri të saj. Zgjedhjet kanë nisur në orën 08:00 të mëngjesit dhe pritet të mbyllen në orën 19:00, për të vijuar me numërimin e votave më 19:30. Sipas burimeve të Partisë Demokratike, brenda orës 08:00 të ditës së nesërme pritet edhe rezultati.

Në garë për të drejtuar partinë janë kreu aktual i PD, Lulzim Basha, si dhe tre demokratë të tjerë Fatbardh Kadilli, Edith Harxhi dhe Agron Shehaj.

Janë 75 mijë anëtarët e PD, që pritet t’i drejtohen 76 qendrave të votimit të ngritura në të gjithë vendin, përmes të cilave ata do të ushtrojnë të drejtën e votës për të zgjedhur kryetarin. Sipas udhëzimit, duhet të zgjedhin vetëm 1 prej kandidatëve, pasi vota e tyre do të jetë nul nëse votojnë për më shumë se një prej katër emrave në garë. Në fletën e votimit, Fatbardh Kadilli është i renditur i pari, e pas tij Edith Harxhi, Agron Shehaj e Lulzim Basha.

Procesi i votimit deri më tani vijon i qetë në të gjitha qarqet, ndërsa pak më parë ka votuar kreu aktual i PD, Lulzim Basha në selinë qendrore në Tiranë.

Matura Shtetërore / Dy realitete – Shqipëri dhe Suedi

Maturantët e vitit shkollor 2020-2021, që po protestojnë përpara Ministrisë së Arsimit, për tezat e ndërlikuara dhe me përkthime të pakuptueshme të provimit të matematikës të Maturës Shtetërore, janë ulur këmbëkryq duke pritur një reagim nga ministrja Evis Kushi. Të tjerë si ata janë ulur në sheshet përpara drejtorive arsimore në qytetet e tyre duke pritur një përgjigje.

Provimin e matematikës që e kanë dhënë dje, ata e kanë cilësuar si shumë të vështirë dhe kërkojnë që të rishihet mënyra se si do të vlerësohen nga Ministria e Arsimit. Të vjen keq që për të dytin vit radhazi na duhet të përballemi me të njëjtin fenomen!

Krejt e kundërta ndodh me bashkëmoshatarët e tyre në vende të tjera. Më poshtë është një foto nga festa që kanë organizuar bashkëmoshatarët e tyre në Suedi, hedhur në rrjetin social Facebook nga Shefqet Bunjaku.

Festa e përfundimit të studimeve të shkollës së mesme në një gjimnaz të Suedisë!

Matura Shtetërore/ Maturantët protestojnë përballë Ministrisë së Arsimit

Maturantët kanë nisur protestën kundër testit të Matematikës, pjesë e Maturës Shtetërore. Në Tiranë, maturantët janë mbledhur para Ministrisë së Arsimit, dhe kanë bllokuar Rrugën e Durrësit. Pasi janë ulur në rrugë, maturantët kanë lëshuar në kor thirrjen; “Duam drejtësi!”.

Sipas Ballkan Web:

Maturantët kërkojnë që të ulet pikësimi për testin e Matematikës, i cili u zhvillua dje ndërkohë që ata pretendojnë se në këtë provim pati pyetje jashtë programit. “Uljen e pikësimi, provimi ishte i vështirë, pasi ishte një test universitar. Kjo është mënyra jonë. Do vazhdojmë të rrimë këtu deri sa të na plotësohen kërkesat”, tha një maturant.

Durrës:

Në protestë janë edhe maturantët e shkollave të Durrësit, që janë mbledhur përpara Drejtorisë Rajonale të Arsimit Parauniversitar në Durrës.

Protesta e maturantëve të shkollave të Durrësit